يا شيطان شعري الشاعر من يموت
يتعطل فرض والكون يتدارك
انا واثق عفتني وروح لا رديت
يوم فراك وجهك يوم المبارك
شجنيت من الشعر لو سجن لو طعنات
ساعة اصفى وية ربعي وعمر نتعارك
يكلبي ما نفع تعبك ولا ارباك
وحصتك صارت الدوخة والارباك
بطريقك بعد ما اعاين ولا اربيك
من اطيعك هم تردني لحلك حيه
لأن طكات شماتي بهاماي
وشل لاتظن عيني بها ماي
اذا عالذل رضى يبصم بهامي
أكطعه انجان يرضالي برديه
حبيبي جروح الك بالروح حالا
وامس جنت احسن من اليوم حالا
اريدك تنتخيلي وتجي حالا
باجر وين ما تلحك عليه
تتنخه تريد اجيك اليوم بالحال
وانت اعرف حبيب الروح بالحال
شمحلها وياك ماتقتنع بالحل
ادليك الدرب وترد عليه
الحديث بشاهده كالو وربطه
مو كلمن لبس بدله وربطه
حجه وماضام زلاته وره ابطه
يسولف طن ولا تصفه وكيه
روحي المجد والعليه وكرها
الرؤس الخانعه اكطعها واكرها
اموت من البخل واهله واكرهه
وجريمه اشعر بخيل يسوس بيه
آنا الدوه لعلاتك وانا الداي
وجريمه انت اصبحت خصمي ونداي
المثلك حصو ما نكط ولاداي
الحصو بنص المحيط ويشع ميه
النوايب جلد صبري ما انزع الها
ولو بالقوس ما ظل منزع الها
حبيبه تروح عني منو زعلها
اذا تزعل يدور الفلك بيه
هاك اخذ الجروح وياك هارف
ها دك الكلب بجفاك ها رف
مثل خزلة غنم والشوف هارف
شتن مشن كل وحده بنويه
حليم وعقل عندك جنت ذا راي
وجنت نسمة عذيبي وصرت ذاري
شبيك وي الغنم سرحت ذاري
رايك والعقل راحن سويه
مصايب عالكلب نصبو وللو
الهلبت ما نفعني بعد واللو
احبابي بلا ذنب للغير ولو
طبعهم غدر مابيهم حميه
الزمان بفركتك حزين حزنا
وعلى كل الحزن والنوح حزنا
تعال اعلى الدليل وشوف حزنه
مغيم ما صفه ومخبوط ميه
انا الما اكرر بحجي ولا اعيد
ولا احسب بزلاتك ولا اعد
شمالك ما تمر بيه ولا عيد
الخلل مدري بجنابك مدري بيه
جثير هموم اعاين حاسبلها
وانا لايام ضيجي حاسبلها
صفت والذيب اجاها حاس ابلها
راعي البل غفه واثر عليه
وحك من كون الاكوان وابسط
انا اسهل من نسيم الريح وابسط
جنت املك مخدة صوف وبساط
الاجوني فرهدو ذني من اديه
ابد ما يرحم الطايح وكتنا
جمعنا ورجع طشرنا وكتنا
اصيح اعلى الفرح اوكف وك اتنه
تركني وما سمعني ورد عليه
شنفعني الجو يصاحب من خلالي
اخذ ربعي واخوتي من خلالي
جثيرة ذيول عبرت من خلالي
الزلم واشباهها عبرت عليه
و في ختام هذه الابيات يجب ان نعلم ان العراق من اكثر البلدان التي انجبت شعراء ولا شك ان رحيم المالكي كان ابرز الشعراء العراقيين و العرب ، و الشعر احد الاساليب الادبية التي يمكن ان يستخدمها الشاعر للتعبير عما يشعر به او يمكنه استخدام الشعر ليوضح وجهة نظره تجاه رأي او قضية معينة ، فعلينا ان نهتم بدراسة الشعر العربي بوجه عام والشعر العراقي بوجه خاص لما يحتويه من قصائد و ابيات لافضل و اجمل الشعراء …… نتمنى ان تكون هذه الابيات الاليمة قد حازت رضاكم وانتظروا المزيد من الموضوعات المرتبطة بالشعر الاليم و الحزين من خلال موقع احلم.
